રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
પડછાયા વગરનો થઈ ગયો
paDchhaya wagarno thai gayo
કિરણસિંહ ચૌહાણ
કિરણસિંહ ચૌહાણ
ચિત્તમાં એ યુદ્ધની ઘટના વગરનો થઈ ગયો,
હા વગરનો થઈ ગયો ને ના વગરનો થઈ ગયો.
સ્હેજ પણ બોજો નથી ને એક પણ ચિંતા નથી,
જ્યારથી હું નામ-સરનામા વગરનો થઈ ગયો.
એટલો ઊંચે ગયો હું એટલો ઊંચે ગયો,
કે પછી તો સાવ પડછાયા વગરનો થઈ ગયો.
જાત અપરાધી હતી તોયે સજા ન દઈ શક્યો,
બસ પછી હું જાત પર શ્રદ્ધા વગરનો થઈ ગયો.
સાંજને ઇચ્છા મુજબનો અંત ના આપી શક્યો,
હું પ્રણયમાં સાવ મૌલિકતા વગરનો થઈ ગયો.
સ્રોત
- પુસ્તક : ગઝલશતક (પૃષ્ઠ ક્રમાંક 14)
- સંપાદક : હર્ષદ ત્રિવેદી
- પ્રકાશક : ગુજરાત સાહિત્ય અકાદમી
- વર્ષ : 1999