એક રાજા હતો

એક રાજા હતો

વાત વર્ષોની જર્જર પુરાણી હતી એક રાજા હતો એક રાણી હતી

સાવ ઈતિહાસથી યે અજાણી હતી એક રાજા હતો એક રાણી હતી

મેં અમસ્થી લખેલી કથાનાં સહુ પાત્ર સાચાં મળે છે તો હું શું કરું?

કોના હોવાની ઘટના કહાણી હતી? એક રાજા હતો એક રાણી હતી

એક અવસ્થા હતી, ફૂલ-કન્યા હતી, તીરની સાથે છોડેલ ચિઠ્ઠી હતી

ઊડતી એક ઘોડી પલાણી હતી, એક રાજા હતો એક રાણી હતી

કે ઝઝુમ્યું હતું કોણ છેવટ સુધી શેર માટીના સપનાંની સામે સતત

કોની વંશાવલી ધૂળધાણી હતી? એક રાજા હતો એક રાણી હતી

શાપ લાગ્યો હતો એક પળનો અને યુગ પથ્થર થઈ ને વીતાવ્યા હતા

તોય વરદાન જેવી જ વાણી હતી એક રાજા હતો એક રાણી હતી

ek raja hato