રેખ્તા
હિન્દવી
સૂફીનામા
રાજસ્થાની
એ સમયની વાત
e samayni wat
લલિત ત્રિવેદી
લલિત ત્રિવેદી
ન કાયનાત હતી એ સમયની વાત કહું
ન કુછ હયાત હતી એ સમયની વાત કહું
ન રાત રાત હતી એ સમયની વાત કહું
દીવો ન બાત હતી એ સમયની વાત કહું
હતો ન સૂર્ય કે શિર પર ન કોઈ આભ હતું
ક્ષણો મહાત હતી. એ સમયની વાત કહું
ન એટલે જ તરજુમો થયો સમીપતાનો
તું આત્મસાત્ હતી એ સમયની વાત કહું
ફૂલો પતંગિયાંને પ્હેલી વાર મળતાં હતાં
ટશર બિછાત હતી. એ સમયની વાત કહું
નહીં તો તું જ સ્વયમ્ ફૂલ...ખુશ્બ...ઋતુઓ હતી
તું તો અજ્ઞાત હતી એ સમયની વાત કહું
પવન કળીને મળે એવો થનગનાટ હતો
તું તિલસ્માત હતી એ સમયની વાત કહું
ન લેખાંજોખાં હતાં કે ન તાણાંવાણાં હતાં
ન જરૂરિયાત હતી એ સમયની વાત કહું
તું યાદ કર જરા કે એક તું ને હું જ હતાં
ખુદા! ન જાત હતી એ સમયની વાત કહું
સ્રોત
- પુસ્તક : બેઠો છું તણખલા પર (પૃષ્ઠ ક્રમાંક 25)
- સર્જક : લલિત ત્રિવેદી
- પ્રકાશક : રંગદ્વાર પ્રકાશન
- વર્ષ : 2018