રેખ્તા
હિન્દવી
સૂફીનામા
રાજસ્થાની
સમજદારીથી અળગા થઈ જવાનાં સૌ બહાનાં છે,
મને શંકા પડે છે કે દીવાના શું દીવાના છે?
ખુદા! અસ્તિત્વને સંભાળજે કે લોક દુનિયાના,
કયામતમાં એ તારી રૂબરૂ ભેગા થવાના છે.
ગમે ના સૌ કવન તો માફ કરજો એક બાબત પર,
ખુદા જેવા ખુદાનાં ક્યાં બધાં સર્જન મજાનાં છે?
સજા દેતો નથી એ પાપીઓને એટલા માટે,
મરીને આ જગતમાંથી એ બીજે ક્યાં જવાના છે?
ચલો એ રીતે તો કચરો થશે ઓછો આ ધરતીનો,
સુણ્યું છે ધનપતિઓ ચંદ્ર પર રહેવા જવાના છે!
તમે પણ દુશ્મનો ચાલો આ મારા સ્નેહીઓ સાથે,
એ કબ્રસ્તાનથી આગળ મને ક્યાં લઈ જવાના છે?
રહે છે આમ તો શયતાનના કબજા મહીં તો પણ,
‘જલન’ને પૂછશો તો કે’શે એ બંદા ખુદાના છે.
સ્રોત
- પુસ્તક : જલન (પૃષ્ઠ ક્રમાંક 44)
- સર્જક : જલન માતરી
- પ્રકાશક : દુર્રેસહેવાર જ. માતરી
- વર્ષ : 1984