રેખ્તા
હિન્દવી
સૂફીનામા
રાજસ્થાની
રોકાઈ જાવ
rokai jaw
સાબિર વટવા
સાબિર વટવા
ચંદ્ર ઝાંખો થાય છે, રોકાઈ જાવ!
હમણાં વા'ણું વાય છે, રોકાઈ જાવ!
એક ઘડીભર રાતની છે શી વિસાત?
વર્ષો વીતી જાય છે, રોકાઈ જાવ!
અપશુકન છે રોકવામાં, શું કરું?
મારું મન ગભરાય છે, રોકાઈ જાવ!
પંથ નિર્જન, વાટ વસમી, શું થશે?
ભાર દઈ કહેવાય છે, ‘રોકાઈ જાવ!'
વાટ-મારુ છે નિરાશા માર્ગમાં,
કાફલા લૂંટાય છે, રોકાઈ જાવ!
હું ચહું છું વારેવારે ના કહું!
જીભે આવી જાય છે, રોકાઈ જાવ!
હોઠ પર તો છે ‘ખુદાહાફિજ’, છતાં
‘દિલમાં કૈં કૈં થાય છે', 'રોકાઈ જાવ'.
સ્રોત
- પુસ્તક : મધુવન (પૃષ્ઠ ક્રમાંક 38)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન, રાજકોટ
- વર્ષ : 2002
- આવૃત્તિ : 4