રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
જમિયત પંડ્યા 'જિગર'
જીવી રહ્યો છું મરતાં-મરતાં ઠંડા શ્વાસો ભરતાં-ભરતાં,
મરતાં-મરતાં કોણ નજરને દોરી રહ્યું છે હરતાં-ફરતાં?
આંખો સ્થિર છે દર્શન-ઘેલી એ છે ચિંતાતુર જીવનનાં,
દિલના ધબકારા જોવાને હાથ મૂકે છે ડરતાં-ડરતાં.
દુઃખથી ટેવાયેલું હૈયું શાંતિ મેળવશે શું કિનારે?
જા મઝધારે પાછો, પાગલ! આવ્યો તેવો તરતાં-તરતાં.
હસતા જખ્મો ના અળસાયા દૂઝતા ઘાવો ના રૂઝાયા,
હાય અભાગી આખું જીવતર હાર્યો બખિયા ભરતાં-ભરતાં.
ગમગીનીનો બોજ ઘટ્યો કાં સૂકો દરિયો શેં જોવાશે?
એવો શો આધાર મળ્યો, દિલ! ઝરણાં થંભ્યા ઝરતાં-ઝરતાં?
ધરતીકંપ થયો કે ફરી ગઈ દર્શનની આનંદ-ધ્રુજારી;
છૂટી ગયું કાં હાથથી, સાકી! હોઠે પ્યાલું ધરતાં-ધરતાં?
માન 'જિગર' એ પાણી છે જે પાલવને તરબોળ બનાવે,
આંસુ તો તડપ્યા જ કરે છે પાંપણ પર થંભી થરથરતાં.
સ્રોત
- પુસ્તક : મધુવન (પૃષ્ઠ ક્રમાંક 101)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન, રાજકોટ
- વર્ષ : 2002
- આવૃત્તિ : 4