રેખ્તા
હિન્દવી
સૂફીનામા
રાજસ્થાની
કિનારો તો નથી
kinaro to nathi
આસિમ રાંદેરી
આસિમ રાંદેરી
એક ભ્રમણા છે હકીકતમાં સહારો તો નથી,
જેને સમજો છો કિનારો એ કિનારો તો નથી.
એક પણ ફૂલમાં અણસાર તમારો તો નથી,
ભાસ કેવળ છે બહારોનો બહારો તો નથી.
એ ખજાનો છે ગગન કેરો, અમારો તો નથી,
એક પણ એમાં મુકદ્દરનો સિતારો તો નથી.
કેમ અચરજથી જગત તાકી રહ્યું મારું વદન?
સ્હેજ જુઓ, કોઈ પડછાયો તમારો તો નથી.
માત્ર મિત્રોનું નહીં, દુનિયાનું દરદ છે દિલમાં,
કોઈનો મારી મહોબ્બત પર ઇજારો તો નથી.
દિલના અંધકારમાં, આ ચાંદની ક્યાંથી ખીલી!
ચંદ્રમુખ! એ મહીં કંઈ હાથ તમારો તો નથી?
સ્રોત
- પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 74)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 2004