નદી-કાંઠે : ૨

નદી-કાંઠે : ૨

ફરી આવી ચડે છે કોઈ પગપાળું નદી-કાંઠે

અને ચારે તરફ અજવાળું અજવાળું નદી-કાંઠે

અને એવું બને કે હોય જળ ત્યાં શિલ્પના રૂપે

અહીં છે પથ્થરોનું રૂપ પાંખાળું નદી-કાંઠે

દિવસભરની મહેનતની તરસનું આ બળદગાડું

હવે આવી રહ્યું છે આમ જળ-ઢાળું નદી-કાંઠે

ઘૂનામાં ધૂબકો મારી દીધો તેં જળપરી પાછળ!

કે જોતું સ્તબ્ધ થઈ ઊભું છે આ નાળું નદી-કાંઠે

છે દરિયો છોકરા જેવો જ નખરાળો નદી-કાંઠે

નદી પણ છોકરી જેવી જ લજ્જાળુ નદી-કાંઠે

('હાથની હોડી'માં પ્રગટ ગઝલગુચ્છમાંથી સાભાર)

nadii-kaanthe : 2