રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

છે ફક્ત રિસામણું ઝઘડો નથી

અદમ ટંકારવી

છે ફક્ત રિસામણું ઝઘડો નથી

અદમ ટંકારવી

Roman

છે ફક્ત રિસામણું ઝઘડો નથી

આ ગઝલ ડૂસકું જ છે ઠૂઠવો નથી

કોઈ બાળક થાય રાજી જોઈને

એટલો ભોળો કોઈ ચહેરો નથી

પાવા ક્યાં વાગે છે મારા શ્વાસમાં

તારી આંખોમાં હવે મેળો નથી

તળિયાઝાટક છે ઉમંગો એમના

ને અમારો હર્ષ તો માતો નથી

હસતાંહસતાં એને પી નાખો હવે

ઘૂંટડો કંઈ એટલો કડવો નથી

ચોરપગલે પંડમાં પાછા વળો

એ વગર બીજો કોઈ રસ્તો નથી

કોઈ મુશ્કેટાટ બાંધે છે મને

આ ગઝલ લખ્યા વગર છૂટકો નથી

કહેવા સુણવાનો જ લ્હાવો છે અદમ

શબ્દ કેવળ શબ્દ છે દાવો નથી

સ્રોત

પુસ્તક : ૭૮૬ ગઝલો (પૃષ્ઠ ક્રમાંક 165)
સર્જક : અદમ ટંકારવી
પ્રકાશક : લજ્જા પબ્લિકેશન્સ
વર્ષ : 2014