ટોચ પરથી તો જગત નાનું જ દેખાશે તને,

આવ નીચે, એ પછી સાચું જ દેખાશે તને.

ફ્રેમ કે ચશ્મા બદલવાથી ફરક બહુ નહિ પડે,

કાચ ચોખ્ખો રાખ, તો ચોખ્ખું જ દેખાશે તને.

દરવખત કંઈ આંખથી જોવાય છે, એવું નથી;

જો હશે ભીનું હૃદય, ભીનું જ દેખાશે તને.

રાત દા'ડો તું ફકત મોઢું જ શું ધોયા કરે !

આયનો મેલો હશે, મેલું જ દેખાશે તને.

આંખમાંનો મોતિયો અમથો વગોવાઈ ગયો,

અશ્રુઓ પણ જો હશે : ઝાંખું જ દેખાશે તને.

તેેજ માટે સૂર્ય બાજુ તું ભલેને જોઈ લે,

પણ તરત તો ફક્ત અંધારું જ દેખાશે તને.

તું પવનને દૃશ્યમાં દોરી નહીં શકશે કદી,

પણ 'પવન'માં દૃશ્ય તો સારું જ દેખાશે તને.