એવું તને કંઈ યાદ છે

હાથ આડા કોઈ ચહેરાની ઉપર ધરતું હતું એવું તને કંઈ યાદ છે

રેશમી ગુલમહોર જેવું આંખથી ખરતું હતું એવું તને કંઈ યાદ છે

પાંખમાં કલરવ હશેની કલ્પના તો સાવ લીલીછમ બની સ્પર્શી ગઈ

પણ હથેળીમાં કોઈ ખાલીપણું ભરતું હતું એવું તને કંઈ યાદ છે

હે પ્રવાસી, આપણે કયા પ્રેમ જેવા શબ્દના વિસ્તાર જેવું કંઈ હતું

તે છતાં સંબંધનું પોલાણ વિસ્તરતું હતું એવું તને કંઈ યાદ છે

કેટલી નક્કર પ્રયત્નોની હતી એ વ્યર્થતા કંઈ સાંભરે છે કે તને

સૂર્યની પીળાશમાં કોઈ દીવો ધરતું હતું એવું તને કંઈ યાદ છે

ewun tane kani yaad chhe