પિંજરના એક ભાગનું પક્ષીકરણ થયું

પિંજરના એક ભાગનું પક્ષીકરણ થયું.

છાતીના કલબલાટ વિશે શું કહું બીજું?

તારી નિરાંતમયતા મને, ‘કેમ છો?’ –પૂછે,

ટોળાત્મકાયેલો હું હસી લઉં ઘણું ખરું.

ઘડિયાળ અથવા ઘાસ બન્યો હોઉં એ રીતે,

મારે લણાતા અથવા ક્ષણાતા જવું પડ્યું.

સ્વપ્નાપ્રચૂર ઊંધનું ખાલી હતું નગર!

કે પારદર્શિકાઓ વડે એ ભર્યું હતું!

ભીંતેશ્વરાય નમ: કહી હાથ જોડ્યા બાદ,

સાષ્ટાંગવત દશામાં પલંગસ્થ થઈ જવું.

pinjarna ek bhaganun pakshikran thayun