બજારમાંથી હું ચશ્માં નવાં લઈ આવ્યો

બજારમાંથી હું ચશ્માં નવાં લઈ આવ્યો

ને બીલ પેટે મારી બેઉ આંખ દઈ આવ્યો

ક્યાંક વરસાદ પડ્યો, ધોરિયા દડ્યા તે વાત

હું બાલ્યકાળની મારી છબીને કહી આવ્યો

હું જંગલોમાં ગુલમહોરની કરતો'તો તલાશ

ને એ દુકાનના શો–કેસમાં મળી આવ્યો

મને ખબર છે, ભરી'તી મેં પેનમાં શાહી

લખ્યું – તો કાગળો ઉપર સમુદ્ર વહી આવ્યો

ખબર નહોતી નહીં બહાર જઈ શકાય, રમેશ

હું કાચ જેવા નગરમાં તિરાડ થઈ આવ્યો

Bajarmathi hun chashmaan navaan laii aavyo