અડાબીડ કૈંક અંદરનાં અરણ્યો બહાર આવ્યાં છે

અડાબીડ કૈંક અંદરનાં અરણ્યો બહાર આવ્યાં છે,

પશુતા પાંગર્યાનાં સૌ રહસ્યો બહાર આવ્યાં છે.

ઉઘાડી પાત્ર સોનાનું નિહાળ્યું જેટલી વેળા,

ચમકતા સત્યના વેશે અસત્યો બહાર આવ્યાં છે.

હકીકત બહાર ના આવી ઘટેલી એક ઘટનાની,

બન્યા નહોતા બનાવો એનાં તથ્યો બહાર આવ્યાં છે.

સભામાં તો ગયા પણ સભ્યતાને લઈ ગયા નહોતા,

અહીં મેદાનમાં એવા જ સભ્યો બહાર આવ્યા છે.

ગઝલ કંઈ એકલી આવી નથી આ બહાર અંદરથી!

અમારી આંખથી પણ અન્ય દ્રવ્યો બહાર આવ્યાં છે.

adaabiid kaink andarnaa aranyo bahaar aavyaan chhe