રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

ગુમ

અરવિંદ ભટ્ટ

ગુમ

અરવિંદ ભટ્ટ

Roman

બત્તી કરું ને જેમ થતો અંધકાર ગુમ

ક્યાં એમ થઈ શકે છે તમારો વિચાર ગુમ

ને બર્ફ જેમ ઓગળી શકાય પણ નહીં

મારામાં કોઈ થઈ ગયું છે આરપાર ગુમ

એ ભુલભુલામણી છે પુરાતન મહેલની

અંદર પ્રવેશ આપીને થઈ જાય દ્વાર ગુમ

પાદરના પથ્થરોને હજુ યે પૂછ્યા કરું

કે ક્યાં થઈ ગયો છે એ ઘોડેસવાર ગુમ

દેખાય જો મને તો સલામત રહે નહીં

તેથી જ થઈ ગયો છે એ પરવરદિગાર ગુમ

સ્રોત

પુસ્તક : ગઝલ 81-82 (પૃષ્ઠ ક્રમાંક 14)
સંપાદક : હર્ષદ ચંદારાણા
પ્રકાશક : રૂપાલી પબ્લીકેશન
વર્ષ : 1983