આખરે તૂટી ગયા શંકાના સૌ ઉપવાસ, હાશ!

આખરે તૂટી ગયા શંકાના સૌ ઉપવાસ, હાશ!

મારી શ્રદ્ધા ધીમે ધીમે લેતી થઈ ગઈ શ્વાસ, હાશ!

ભીની કેડી પર જતાં પગલાં થવાનો ભય હતો,

પણ હવે એની ઉપર ઊગી ગયું છે ઘાસ, હાશ!

સાંજના રંગને જોવામાં હતા તલ્લીન સૌ,

કોઈ જાણી ના શક્યું કે હું હતો ઉદાસ, હાશ!

જે ક્ષણો જોવી જ ન્હોતી એ ક્ષણો સામી મળી,

એ જ વખતે વીજળી ગઈ, ના રહ્યો અજવાસ, હાશ!

આંખ વરસી તો હ્રદયની ભોંય પણ ભીની થઈ.

પોચી માટીમાં હવે પાડી શકાશે ચાસ, હાશ!

akhre tuti gaya shankana sau upwas, hash!