એટલા માટે રુદન મારું ઘણું છાનું હતું

એટલા માટે રુદન મારું ઘણું છાનું હતું,

અશ્રુઓ સાધન તરસ મારી છીપાવવાનું હતું.

એના હાથે માનવી રહેંસાઈ ટળવળતો રહ્યો,

આ જગત એવું અધૂરું એક કતલખાનું હતું.

મારે વહેવાના સમય પર હું તો છલકાઈ ગયો,

લક્ષ સાગરમાં ભળી ઊંડાણ જોવાનું હતું.

હું જ નીરખતો હતો એ વાત હું ભૂલી ગયો,

મારા મનથી પાપ મારાં કોણ જોવાનું હતું?

એટલે તો મેં નજર પણ ના કરી એ દૃશ્ય પર,

કે ગગનથી તારલા વિણ કોણ ખરવાનું હતું!

અર્થ એનો એ નથી હું પણ 'જલન' તરસ્યા કરું,

ઝાંઝવાંઓને તો જીવનભર તરસવાનું હતું.

એ જ કારણસર રડ્યો ના હું સ્વજનના મોત પર

ઓ 'જલન', જાણે કે મૃત્યુ મારું પોતાનું હતું.

aetlaa maate rudan maarun ghanun chhanun hatun