કારણ વગરનાં કારણો રસ્તે નડી ગયા

કારણ વગરનાં કારણો રસ્તે નડી ગયા,

સીધી સફરમાં અવનવા ફાંટા પડી ગયા.

ભીની હવાને એક-બે શ્વાસો અડી ગયા,

ચાલ્યા વગર, રસ્તા ઉપર પગલા પડી ગયા.

તારા અબોલા કેટલા વ્યાપક બની ગયા,

આખા નગરમાં મૌનના પડઘા પડી ગયા.

તારા નયનમાં વન હતું, મારા નયનમાં રણ,

બંને દિશામાં આપણે ભૂલા પડી ગયા.

એકેક જણ પાસે હવે નવતર ઉજાસ છે,

જાણે બધાને આગવા સૂર્યો જડી ગયા.

ગુમનામ ઘરની શૂન્યતા સારી હતી 'કુમાર',

મહેફિલમાં તો સૌના ભરમ નજરે ચડી ગયા.

karan vagarnan karno raste nadii gyaa