આવ અથવા તારા સુધી આવવા દેજે મને

આવ અથવા તારા સુધી આવવા દેજે મને,

ખોલ નહીં પણ બારણું ખખડાવવા દેજે મને.

કોઈ તારી ડાયરી મારે નથી જોવી અહીં,

આવ જો સામે તો આંખો વાંચવા દેજે મને.

હાજરી તારી અહીં વરતાય એવું રાખજે,

આ જગતનાં દુઃખ બીજાં તું ભૂલવા દેજે મને.

ઊંઘમાં આવું નહીં હું તારી પાસે સ્વપ્નમાં,

ઊંઘતી વેળા હંમેશાં જાગવા દેજે મને.

ચિત્ર તારાથી વધારે ખૂબસૂરત થાય છે,

આમ તારી કલ્પનાઓમાં જવા દેજે મને.

aaw athwa tara sudhi aawwa deje mane