રેખ્તા
હિન્દવી
સૂફીનામા
રાજસ્થાની
આવ્યાં હવાની જેમ અને ઓસરી ગયાં
aavyaan havaanii jem ane osarii gayaan
રાજેન્દ્ર શુક્લ
રાજેન્દ્ર શુક્લ
આવ્યાં હવાની જેમ અને ઓસરી ગયાં,
શો શૂન્યતાથી જામ સપનનો ભરી ગયાં!
વીતી ગઈ એ વેળ, હવે અહીં કશું નથી,
સ્મરણોય આવી આવીને પાછાં ફરી ગયાં!
હું શું કરું જ્યાં કંઠ જરીય ખૂલતો નથી,
ગીતો તો કેટલુંય અરે કરગરી ગયાં!
તારા ગયા પછી ન બન્યું કંઈ નવું અહીં,
અધઊઘડી બે છીપથી મોતી ઝરી ગયાં!
જોઈ અટૂલી મ્હેંક સમય પૂછતો ફરે –
'ફોર્યાં અહીં જે ફૂલ, તે ક્યારે ખરી ગયાં!'
વાતો રહી ગઈ એ કસુંબલ મિજાજની,
એ ઘેન, એ ઘટા, એ ઘૂંટ, સહુ સરી ગયાં!
એની ખીણો મહીં જ સમય ખૂંપતો ગયો,
શબ્દો અજાણતાં જે તમે કોતરી ગયાં!
સ્રોત
- પુસ્તક : ગઝલ સંહિતા (દ્વિતીય મંડલ) (પૃષ્ઠ ક્રમાંક 23)
- સર્જક : રાજેન્દ્ર શુક્લ
- પ્રકાશક : સહૃદય પ્રકાશન