રેખ્તા
હિન્દવી
સૂફીનામા
રાજસ્થાની
રસ્તો નથી જડતો
rasto nathi jaDto
શૂન્ય પાલનપુરી
શૂન્ય પાલનપુરી
કદમ અસ્થિર હો એને કદી રસ્તો નથી જડતો;
અડગ મનના મુસાફરને
હિમાલય પણ નથી નડતો.
તમારા મનને જીતી લો તો
હું માનું, “સિકંદર છો”,
નહીંતર દિગ્વિજય ઉચ્ચારવામાં શ્રમ નથી પડતો.
સદા સંસારીઓ પર શ્રાપ છે સંતાપ સહેવાનો;
ધરાથી દૂર ઉડનારાને પડછાયો નથી અડતો.
બનાવીને સુરાલયનો ખુદા એને કરું સજદા!
બતાવો એક પણ એવો, નશો જેને નથી ચડતો!
નજર હો તો બતાવે છે બધું શ્રદ્ધા જ ઘર બેઠાં,
ફરે છે બાવરો થઈ શૂન્ય કાં જંગલમાં આથડતો?
સ્રોત
- પુસ્તક : કાવ્ય-કોડિયાં – સંપુટ 4 – ‘શૂન્ય’ પાલનપુરીનાં ચૂંટેલાં કાવ્યો (પૃષ્ઠ ક્રમાંક 49)
- સંપાદક : રાજેન્દ્ર શાહ
- પ્રકાશક : લોકમિલાપ ટ્રસ્ટ
- વર્ષ : 1982