આજ તો વર્ષાય અવસર થઈ ગઈ

આજ તો વર્ષાય અવસર થઈ ગઈ,

સીમ આખી આયનાઘર થઈ ગઈ!

વાદળો એવી રીતે વરસી પડ્યાં,

ગારની ભીંતોય ખેતર થઈ ગઈ!

આંગણામાં એમનાં પગલાં પડ્યાં,

ઝૂંપડી બે વેંત અધર થઈ ગઈ!

મેં તો એમ જ ચીંધી એના ઘર તરફ,

આંગળી મારી તવંગર થઈ ગઈ!

મેલીઘેલી એક માતાએ જરા,

ફૂલને તેડ્યું તો સુંદર થઈ ગઈ!

દીકરો મોટો થયાની છે ખુશી,

ખેદ છે કે ટૂંકી ચાદર થઈ ગઈ!

નીકળ્યો 'રાકેશ' અહીંથી હાઈવે,

કેટલી કેડીઓ પડતર થઈ ગઈ.

aaj to varshaay avsar thaii gaii