કેવી હશે એ શાય રે

કેવી હશે એ શાય રે

કાળથી ઘેરી ને અણખૂટ કઈ હશે પરછાંય રે

સૂની સૂની આંખથી ઊંડી હશે કઈ ખાય રે!

કઈ કલમમાં મૂકું મારી દોડતી હરણીઓને

કયા પરોઢે ઠારવા મેલું ધધખતી કાય રે!

શું તો એ શબ્દો હશે? ને ચિત્ર એ કેવું હશે?

આંખડી કેવી હશે? કેવી હશે એ શાય રે?

શબ્દમાં ભરવા જતાં તો સરકી સરકી જાય છે

મુઠ્ઠીમાં ભરવા જતાં વેરાય છે જેમ રાય રે!

જેમ મધમાં મધ ભળે તો બેવડું થૈ જાય છે

ટેરવાંમાં ટેરવાં એવાં, સખિ! પડઘાય રે!

સતમી ટૂંકે પૂછું? કોઈ ગુફામાં જઈ પૂછું?

આગથી રાતી, ગગનથી ઊંચી કઈ છે લાય રે!

(ર૯-૬-'૧ર, ૩૦-૬-'૧ર)

kewi hashe e shay re