રેખ્તા
હિન્દવી
સૂફીનામા
રાજસ્થાની
આપને તારા અંતરનો એક તાર,
બીજું હું કાંઈ ન માગું:
સુણજે આટલો આર્ત્ત તણો પોકાર
બીજું હું કાંઈ ન માગું.
તુંબડું મારું પડ્યું નકામું,
કોઈ જુએ નહીં એના સામું.
બાંધી તારા અંતરનો ત્યાં તાર,
પછી મારી ધૂન જગાવું :
સુણજે આટલો આર્ત્ત તણો પોકાર,
બીજું હું કાંઈ ન માગું.
એકતારો મારો ગુંજશે મીઠું,
દેખશે વિશ્વ રહ્યું જે અદીઠું.
ગીતની રેલશે એક અખંડિત ધાર,
એમાં થઈ મસ્ત હું રાચું :
આપને તારા અંતરનો એક તાર,
બીજું હું કાંઈ ન માગું.
સ્રોત
- પુસ્તક : કેડી (પૃષ્ઠ ક્રમાંક 112)
- સર્જક : બાદરાયણ
- પ્રકાશક : ધ જનરલ બુક ડીપો
- વર્ષ : 1941