રેખ્તા
હિન્દવી
સૂફીનામા
રાજસ્થાની
ઊંડી રજની
uundii rajnii
નરસિંહરાવ દિવેટિયા
નરસિંહરાવ દિવેટિયા
(રાગ : મ્હાડ)
આ શી ઊંડી રજની આજની
ભણે ઊંડા ભણકાર!
ઘેરી ગુહા આકાશની રે
માંહિ સૂતો ઊંડો અન્ધકાર,
ઊંડાં ડૂબ્યા નભતારલા કંઈ
ગૂઢ સંદેશ વ્હેનાર રે;
આ શી ઊંડી રજની!
શાન્તિપૂર રેલી રહ્યું રે
ઊંડું, અદ્ભુત, સહુઠાર,
એ પૂરને ઝીણું ઝીણું હલાવી
છાનો અનિલ રમે સુકુમાર રે;
આ શી ઊંડી રજની!
ડૂબી ઊંડી એ પૂરમાં રે
તરુવરકેરી હાર,
મોહમન્ત્રથી મૂઢ બની એ
કાંઈ કરે ન ઉચ્ચાર રે
આ શી ઊંડી રજની!
મૂઢ બન્યો એહ મન્ત્રથી રે
સ્તબ્ધ ઊભો હું આ વાર;
ગૂઢ અસંખ્ય ભેદો કંઈ
કરે ચોગમ ઘોર ઝંકાર રે
આ શી ઊંડી રજની!
જાગી ઊઠી એ ઝંકારથી રે;
અનુભવું દિવ્ય ઓથાર;
ભરાયું ભેદ અસંખ્યથી રે
મ્હારું હૃદય ફાટે શતધાર રે
આ શી ઊંડી રજની!
ગૂંથાયું એ શત ધારથી રે
એહ સ્તબ્ધ હૃદય આ ઠાર;
શાન્ત, અદ્ભુત, ઊંડા કંઈ,
સુણે ઉચ્ચ ગાનના પુકાર રે
આ શી ઊંડી રજની!
સ્રોત
- પુસ્તક : હૃદયવીણા (પૃષ્ઠ ક્રમાંક 107)
- સર્જક : નરસિંહરાવ ભોળાનાથ દિવેટિયા
- પ્રકાશક : જમનાદાસ લક્ષ્મીદાસ
- વર્ષ : 1934
- આવૃત્તિ : ત્રીજી આવૃત્તિ