ઊગતો સૂરજ તને આપું છું

ઊગતો સૂરજ તને આપું છું, લે - તું એને સાંજ સુધી સાચવે તો સારું

ઝળહળતી આંખોમાં જોજે ભરબપોરે ઊતરે ના સાંજનું અંધારું.

ખરતાં ફૂલોને રોજ જોવાના બાગમાં

ઊગ્યાં-ના-ઊગ્યાં ને ઓરાયાં આગમાં

પાંચ પાંચ પાંખડીનું આપું છું ફૂલ, એને જીવ જેમ જાળવે તો સારું

જીવતરના વ્હેણનેય વાંકાચૂકા વહીને આખર તો બનવાનું ખારું!

રસ્તા ઘણા ને ઘણી ભૂલ ને ભુલામણી

અધવચ્ચે અણધારી આફત ને તાવણી

રેશમની દોર એક આપું છું, લે - ન તૂટે, છેક લગી સાચવે તો સારું

અધવચ્ચે બાંધીને ખેંચી ન જાય પેલું અણધાર્યું મોત જો અકારું!

uugato suuraj tane aapun chhun