ભીંત્યું ભાગ્યશાળી

ભીંત્યું ભાગ્યશાળી

ભીંત્યું કેવી તમે ભાગ્યશાળી,

ગાર્યું કરે ગોરા હાથવાળી;

ગોપી ચીતરી કાનુડો ચીતર્યો,

ચીતર્યાં ગોપ ને ગોવાળી-ભીત્યું...

ખરબચડા જેવી તું ઊભી' તી ખોરડે,

અટૂલી ને ઓશિયાળી;

ચૂડિયુંવાળા હાથે છંદાણી તું,

સુખણી થઈ ગઈ સુંવાળી-ભીત્યું...

ઘૂંઘટામાંથી બા'રે મોઢાં ન કાઢતી,

ન પેનિયું કોઈએ નિહાળી;

પદમણી તારી દેયું પંપાળે

હેમ સરીખા હાથવાળી-ભીત્યું...

ધોળી રે ધૂળના છાંટા ઊડ્યા, જાણે

તારલે રાત અજવાળી;

ચાંદની જેમ તને ચારે દૃશ્યુંએ,

ઓળીપો કરીને ઉજાળી-ભીંત્યું...

પસીનો લૂછતાં ઓઢણી પડી ગઈ,

લજવાણી લાજાળી :

ભાવ ભરેલી એ દેહમાં ભાળી તેં,

રેખાઉં હરિયાળી-ભીંત્યું...

'દાદ' કરમની દીવાલ ઊઘડી,

કોણે નમાવી ડાળી;

જડે ચેતનના પ્રતિબિંબ ઝીલ્યાં એ

વાતું વીગતાળી-ભીંત્યું...

bhiintyun bhaagyashaalii