takdirne trophnari - Geet | RekhtaGujarati
search search
લૉગ-ઇન

તકદીરને ત્રોફનારી

takdirne trophnari

ઝવેરચંદ મેઘાણી ઝવેરચંદ મેઘાણી
તકદીરને ત્રોફનારી
ઝવેરચંદ મેઘાણી

[‘બાઈ! મેં તો પકડી આંબલિયાની ડાળ રે

જંગલ બીચ હું ખડી રે જી’ - એ ભજનનો ઢાળ]

બાઈ! એક ત્રાજવાં ત્રોફણહારી આવી રે,

ત્રોફાવો રૂડાં ત્રાજવાં હો જી;

છૂંદાવો આછાં છૂંદણાં હો જી.

બાઈ! એ તો નીલુડા નીલુડા રંગ લાવી રે,

ત્રોફાવો નીલાં ત્રાજવાં હો જી!

છૂંદાવો ઘાટાં છૂંદણાં હો જી!

નાની એવી કુરડી ને, માંહી ઘોળ્યા દરિયા;

બાઈ! એણે કમખામાં સોય તો સંતાડી રે,

પાલવ ઊંચા નો કર્યા હો જી. -બાઈ! એક.

આભને ઉરેથી એણે આઘી કરી ઓઢણી,

બાઈ! એણે નવ લાખ ટીબકી બતાડી રે;

કીધું કે આ મેં ત્રોફિયાં હો જી. -બાઈ! એક.

રામને રુદેથી એણે કોરે કરી પાંભરી,

બાઈ! એણે કીરતિની વેલડિયું ઝંઝેડી રે

કીધું કે આ મેં ત્રોફિયાં હો જી. -બાઈ! એક.

ભર રે નીંદરમાં સૂતેલા ભરથરી,

બાઈ! એના લલાટેથી લટડી ખસેડી રે

કીધું કે આ મેં ત્રોફિયાં હો જી. -બાઈ! એક.

પીઠ તો ઉઘાડી એણે જોગી ગોપીચંદની,

બાઈ! એની જનેતાને આંસુડે ઝરડેલી રે

કીધું કે આ મેં ત્રોફિયાં હો જી. -બાઈ! એક.

મનડાં મોહાણાં મારાં, દલડાં લોભાણાં ને,

બાઈ! મેં તો કાયાને કીધલ ત્યાં ઉઘાડી રે

લાડુડા એણે મૂકિયા હો જી. -બાઈ! એક.

સુરતા રહી નૈ મારી, સૂતી હું તો લે'રમાં;

બાઈ! એણે સોયુંની ઝપટ જે બોલાવી રે

ઘંટીનાં પડ જ્યું ટાંકિયાં હો જી. -બાઈ! એક.

ગાલે ટાંક્યાં ગલફૂલ, કાંડે ટાંકી કાંકણી;

બાઈ! મારી ભમ્મર વચાળે ટીલ તાણી રે

ત્રોફ્યાં, ને ભેળાં ફૂંકિયાં હો જી. -બાઈ! એક.

કલેજા વચાળે એણે કોર્યો એક મોરલો,

બાઈ! મેં તો અધૂરો ત્રોફાવી દોટ મારી રે

કાળજડાં કોરાં રિયાં હો જી. -બાઈ! એક.

ડેરે ને તંબૂડે ગોતું, ગોતું વાસે ઝૂંપડે;

બાઈ! મારાં તકદીરની ત્રોફનારી રે

એટલામાં ચાલી ગઈ કિયાં હો જી. -બાઈ! એક.

સ્રોત

  • પુસ્તક : સોના નાવડી (પૃષ્ઠ ક્રમાંક 378)
  • સંપાદક : જયંત મેઘાણી
  • પ્રકાશક : ગુજરાત સાહિત્ય અકાદમી
  • વર્ષ : 1997