રેખ્તા
હિન્દવી
સૂફીનામા
રાજસ્થાની
શૈશવનો સાદ
shaishavno saad
રાજેન્દ્ર શાહ
રાજેન્દ્ર શાહ
દૂરથી આવે શૈશવનો સાદ સુકોમળ, આજને આંગણ;
અડધા ખૂલ્યા બારણેથી મન જાય રે દોડી વયનું એને કોઈ ન વારણ...
ઘેર ઘટાળા વડલે
ખેલે ઝૂલવી જટા
ગામનો આરો વેગળો મેલી
ભેખડ ભીસ્યાં
જલમાં પડી ન્હાવું;
કાળવી તે કોયલને ચાળે ચીડવી
એના ભોલડ બોલે ભરવું કાનન...
ગાયને ગળે ઘંટડી બાંધી
ધરવું એને
ખોબલે આણ્યું ખાવું
પોળનાં નાનાં ગલૂડિયાંને
એકઠાં કરી
શેડકડું દૂધ પાવું;
વાંકડીઆ મોવાળમાં મેલી મોરનું પીંછું
મોરલીને છંછેડવી ભાવન...
આજ અકારણ
શૈશવને સાદ ઘેલું મન
જાય રે હડી કાઢતું,
ના ગણકારતું જરા કોઈનું વારણ...
સ્રોત
- પુસ્તક : કાવ્ય-કોડિયાં – રાજેન્દ્ર શાહનાં કાવ્યો (પૃષ્ઠ ક્રમાંક 84)
- પ્રકાશક : લોકમિલાપ ટ્રસ્ટ