રેખ્તા
હિન્દવી
સૂફીનામા
રાજસ્થાની
આછું પરોઢનું અજવાળું...
સૈયર ઢોલિયો શેં ઢાળું?
કોરેમોરે પાંદડ્યું ને વચમાં રાતું ફૂલ
રાતા ફૂલમાં પોઢ્યા રામજી ઝલમલ ઝલમલ હું જ
મારું મઘમઘતું થેપાડું!
સૈયર ઢોલિયો શેં ઢાળું?
અડખે પડખે કોઈ નથી-ની અઢળક અઢળક ભીંસ
ફળિયે રોપ્યો ઉજાગરો ને ઊગી તીણી ચીસ
ઝરમર ચોમાસું ક્યાં ખાળું?
સૈયર ઢોલિયો શેં ઢાળું?
કાંટો વાગ્યો હોય તો ઘચરક એનો થાય ઉપાય
ઑય મા આ તો અંધારાનું ઝોડઝપટિયું કાંઈ
હું તો વણવીંધ્યું પરવાળું!
સૈયર ઢોલિયો શેં ઢાળું?
સ્રોત
- પુસ્તક : સાંબેલું ચંદણ સાગનું (પૃષ્ઠ ક્રમાંક 11)
- સર્જક : મનહર જાની
- પ્રકાશક : પોતે
- વર્ષ : 2001