રેખ્તા
હિન્દવી
સૂફીનામા
રાજસ્થાની
જીવાભાઈ પટેલ
દુખિયાંનો વિસામો રે, માડી ત્હારી ઝુંપડી,
રણ વગડાનો છાંયોરે, આંધળિયાંની લાકડી-
કુંજેનિકુંજે લચી વલ્લરી, નિર્ઝરિયાં સંતાય;
વિમળ કમલ દલ પર પંખીડાં બ્રહ્મલીલાને ગાય;
રઢીયાળી એ વાડીરે, સેાહવતી જે ઝુંપડી,
આજે ખાવા ધાતીરે, નિર્જન રણમાં ઝુંપડી—દુખિયાંo
ધર્મ કર્મ રસકસ લુટાયું, ઘર ઘરવખરી હીર,
છતી સંતતિ સત્ત્વ લુટાયું, ખેચાયાં તુજ ચીર;
લુટાતી એ માડીરે, ખાલી ત્હારી ઝુંપડી,
ખાલી તોયે મ્હારીરે, માડી ત્હારી ઝુંપડી—દુખિયાંo
ધન રૂંધી ખેતર સૂકવીઆં, દવ પ્રેર્યો ચોપાસ,
રાતી વિભુની આંખડી દેખી, પંખીડાં પામે ત્રાસ;
તેને સોડે સ્હાતીરે, માડી ત્હારી ઝુંપડી,
પોષણીઆં શી પાતીરે, આછી જાડી રાબડી—દુખિયાંo
વન વીંટ્યા સીચાણે સઘળાં, અવશ પડ્યાં તુજ બાળ,
ઠામ ઠર્યોને હડધૂત કરીને, રણ વગડે દે માર;
અંકે લેવા ધાતીરે, તેને માતા રાંકડી,
શીળી છાંયે છાતીરે, માડી ત્હારી ઝુંપડી—દુખિયાં૦
ચણ કણ કાજે વન વન વીંઝે, તુજ બાલુડાં પાંખ,
પણ સુખ દુઃખનાં લ્હાણાં લેવા, ઠરતી તુજપર આંખ;
અંતે તું સંઘરતીરે, માતા મ્હારી દુબળી,
પ્રભુનો પંથ દાખવતીરે, માડી ત્હારી ઝુંપડી-દુખિયાંo
તુંજ જીવન અમ તુંજ સર્વસ્વ, તુંજ સુધાનો સાર,
મૂર્તિમતી વત્સલતા દેવી, તું સુર લેાકનું દ્વાર;
નંદનવન શી વ્હાલીરે, અમને તારી ઝુંપડી,
જન્મભૂમી વ્રત પાળીરે, શણગારીશું ઝુંપડી—દુખિયાંo
સ્રોત
- પુસ્તક : સંગીત મંજરી (પૃષ્ઠ ક્રમાંક 9)
- સંપાદક : હિમ્મતલાલ ગણેશજી અંજારિયા
- પ્રકાશક : હિમ્મતલાલ ગણેશજી અંજારિયા
- વર્ષ : 1920
- આવૃત્તિ : 2