રેખ્તા
હિન્દવી
સૂફીનામા
રાજસ્થાની
આપણે આવળ બાવળ બોરડી
aapne aawal bawal borDi
રાજેન્દ્ર શાહ
રાજેન્દ્ર શાહ
આપણે આવળ બાવળ બોરડી,
કેસરઘોળ્યા ગલના ગોટા જી;
હલકાં તો પારેવાંની પાંખથી
મ્હાદેવથી યે પણ મોટા જી.
આપણા ધડવૈયા બાંધવ! આપણે.
કોઈ તો રાચે છે વેળુછીપથી,
કોઈ તો જળને હિલ્લોળ જી;
મરજીવો ઊતરે મ્હેરામણે,
માથા સાટે મોતી-મોલ જી.
નજરું ખૂંપી છે જેની ભોંયમાં,
સામે પૂર એ શું ધાય જી!
અધીરા ઘટડાનો ઘોડો થનગને,
અણદીઠ ઓરું એને પાય જી.
બેઠેલાનું બેઠું રહે વિમાસણે,
વેળા જુએ નહિ વાટ જી;
ઝાઝેરો ઝૂક્યો છે આંબો સાખથી,
વેડે તેને આવે હાથ જી.
પંડની પેટીમાં પારસ છે પડ્યો,
ફૂટલાં કૂટે છે કરંમ જી.
વાવરી જામે તે બડભાગિયો,
જળહળ એનાં રે ભવંન જી.
સ્રોત
- પુસ્તક : સંકલિત કવિતા (પૃષ્ઠ ક્રમાંક 100)
- સર્જક : રાજેન્દ્ર શાહ
- પ્રકાશક : જયવદન તક્તાવાલા સાંસ્કૃતિક પ્રવૃત્તિ
- વર્ષ : 1983