રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ન્હાનાલાલ દલપતરામ કવિ
મ્હારા કેસર ભીના કંથ હો! સિધાવોજી રણવાટ:
આભ ધ્રૂજે, ધરણી ધમધમે રાજ! ઘેરા ઘોરે શંખનાદ:
દુન્દુભિ બોલે મહારાજના, હો! સામન્તના જ્યવાદઃ મ્હારાo
આંગણ રણધ્વજ રોપિયા હો! કુંજર ડોલે દ્વારઃ
બંદી જનોની બિરદાવલી હો! ગાજે ગઢ મોઝાર: મ્હારાo
પૂર પડે, દેશ ડૂબતા હો! ડગમગતી મ્હોલાતઃ
કીર્તિ કેરી કારમી, રાજ! એક અખંડિત ભાત: મ્હારાo
નાથ! ચ્હડો રણ ઘોડલેરે, હું ઘેર રહી ગૂંથીશઃ
બખ્તર વજ્રની સાંકળી: હો! ભર રણમાં પાઠવીશ: મ્હારાo
સંગ લેશો તો સાજ સજું હો! માથે ધરૂં રણમ્હોડ
ખડગને માંડવ ખેલવાં, મ્હારે રણ લીલાના કોડઃ મ્હારાo
આવતાં ઝાલીશ બાણેને હો! ઢાલે વાળીશ ઘાવ:
ઢાલ ફુટ્યે મ્હારા ઉરમાં, રાજ! ઝીલીશ દુશ્મનના દાવ: મ્હારાo
એક વાટ રણવાસનીરે, બીજી સિંહાસન વાટ:
ત્રીજી વાટ શોણિતની સરિતે હો શૂરના સ્નાનનો ઘાટ: મ્હારાo
જય કલગી એ વળજો, પ્રીતમ! ભીંજશું ફાગે ચીરઃ
નહિં તો વીરને આશ્રમ મળશું હો! સુર ગંગાને તીર; મ્હારાo
રાજમુગટ રણ રાજવી! હો રણ ઘેલા! રણ ધીર!
અધીરો ઘોડીલા થનગને, નાથ! વાધો રણે, માહાવીર! મ્હારાo
સ્રોત
- પુસ્તક : સંગીત મંજરી (પૃષ્ઠ ક્રમાંક 13)
- સંપાદક : હિમ્મતલાલ ગણેશજી અંજારિયા
- પ્રકાશક : હિમ્મતલાલ ગણેશજી અંજારિયા
- વર્ષ : 1920
- આવૃત્તિ : 2