રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ફેરો
phero
દલપત પઢિયાર
દલપત પઢિયાર
નક્કામો આ ફેરો દલજી નક્કામો આ નેડો!
કોણ રહ્યું સણસારી ભીતર કોણ ફાડતું છેડો!
મેંદી જેવું મન ઉછેરી
મલક બધીમાં મા’લ્યા,
માટીની ઇચ્છાએ ઓથે
ઘેઘૂર થઈને ફાલ્યા!
તૂટતાં પાન પવન પરબારો તોય મૂકે ના કેડો
નક્કામો આ ફેરો દલજી...
આમ જુઓ તો સાવ અડોઅડ
આમ જુઓ તો આઘું
પિંડ અને પડછાયા વચ્ચે
પડતર જેવો લાગું!
શિખર ચડું કે શેઢો નભનો નથી કશે નિવેડો,
નક્કામો આ ફેરો દલજી...
શ્વાસે શ્વાસે દોરી જેવું
કોણ ઉમેરે, છોડે?
દિન ઊગે દિન ડૂબે
પંખી કયા દેશમાં દોડે?
અંતે પડાવ અણધાર્યો જ્યાં પાંગથ નહી પછેડો,
નક્કામો આ ફેરો દલજી નક્કામો આ નેડો!
સ્રોત
- પુસ્તક : ગુજરાતી કવિતાચયન 1991 (પૃષ્ઠ ક્રમાંક 33)
- સંપાદક : હર્ષદ ત્રિવેદી
- પ્રકાશક : ગુજરાતી સાહિત્ય પરિષદ
- વર્ષ : 1992