રેખ્તા
હિન્દવી
સૂફીનામા
રાજસ્થાની
આંગણાની બહાર
angnani bahar
જગદીશ જોશી
જગદીશ જોશી
યાતનાનાં બારણાને કીધાં મેં બંધ
અને ઉઘાડી એકએક બારી
જાગીને જોઉં છું તો વહેલા પ્રભાતે
કેવી કિરણોની ઝરે ફૂલ-ઝારી!
આંગણાની બ્હાર એક ઊભું છે ઝાડ
એની ડાળ ઉપર પાંદડાંનાં પંખી
ઝાડના આ લીલા તળાવતણા તળિયે તો
ભૂરું આકાશ ગયું જંપી!
વ્હૈ જાતી લ્હેરખીએ બાંધ્યો હિંડોળો
એને તારલાથી દીધો શણગારી.
ક્યાંકથી અદીઠો એક પ્રગટ્યો છે પ્હાડ
એની પછવાડે જોઉં એક દેરી
તુલસીના કયારાની જેમ મારા મનને હું
રાત-દિવસ રહું છું ઉછેરી:
રાધાનાં ઝાંઝરને વાંસળીના સૂર રોજ
જોયા કરે છે ધારી-ધારી.
સ્રોત
- પુસ્તક : આકાશ (પૃષ્ઠ ક્રમાંક 17)
- સર્જક : જગદીશ જોષી
- પ્રકાશક : વોરા એન્ડ કંપની
- વર્ષ : 1972