રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

સીમંતિની

સુશીલા ઝવેરી

સીમંતિની

સુશીલા ઝવેરી

કોઈને હું તો કહું નૈ બસ, વાયરાની જેમ વહું;

ઉદરે મૃદુ ગીત ઉછેરી ફૂલની ફોરમ લઉં.

વણદીઠા એ વદન ઉપર સ્મિત અદીઠું મહેકે;

રહે હથેલી ઝાંખી, ક્યારે મોરલાનું વન ગ્હેકે

પુલક પુલક અણુ અણુ મમ રોમને એવું કહું –

કોઈને હું તો કહું નૈ બસ, વાયરાની જેમ વહું...

પારણું પોપટ મોર મઢ્યું હું નીંદમાં હીંચોળું;

હાલરડાંના સૂરમાં મીઠા, શોધું શૈશવ ભોળું.

હરખની મુજ ઉરમાં વાગે વાંસળી, એવું લહું –

કોઈને હું તો કહું નૈ બસ, વાયરાની જેમ વહું...

પળે પળે હું સુણ્યાં કરું ઝાંઝર ઝીણો રવ;

આંગળી કળી મોગરાની, ગુલપાનીનો પગરવ.

પ્રાણમાં પમરી આવજે મારા વ્હાલમાં વીંટી લઉં

કોઈને હું તો કહું નૈ બસ, વાયરાની જેમ વહું...

સ્રોત

પુસ્તક : અક્ષરા : સ્વાતંત્ર્યોત્તર ગુજરાતી કવિતા (પૃષ્ઠ ક્રમાંક 125)
સંપાદક : યોસેફ મૅકવાન
પ્રકાશક : નેશનલ બુક ટ્રસ્ટ, ઇન્ડિયા
વર્ષ : 2007