રેખ્તા
હિન્દવી
સૂફીનામા
રાજસ્થાની
રાતવન
ratwan
મણિલાલ દેસાઈ
મણિલાલ દેસાઈ
રાતાં પીળાં ઝાડ તળેથી દોડે કાળી વાટ
આંગળીવેઢા ગણવા બેઠી વનમાં ઢાળી ખાટ
હવા આવતી દડબડ દેતી પગલું પીપળપાન
રાતરાણીની વાસ હવાને સુણે માંડી કાન
એક એકથી બમણા ઊંચા આભે પૂગ્યા તાડ
તરડાઈને ક્ષિતિજ તૂટી સિંહે પાડી ત્રાડ
સુકાયેલા પાન તળેથી જાણે નાગણ સરે
અંધારામાં ઝાંખા ઝાંખા ભયના ઓળા ફરે
ચટાક દઈ ઊડનારું ઘુવડ નભનું અસ્તર ચીરે
રાત ઊતરતી ધીરે ધીરે ધીરે ધીરે ધીરે
કીડી એક્કેક અંધારાના કણને દરમાં લાવે
બાવળથી ડોસીની ડાકણ પાછી ઘરમાં આવે
હરણાંફાળે આવી મરડ્યો વાઘણ કેરો કાન
એક ધડાકે સવળી ઊઠયું આડું ઊભું રાન
દરિયામાં સોનાનું ઈંડું ચકલાંચાંચે તૂટે
આમલીએ ભૂતે બાંધેલી રાત બિચારી છૂટે
સ્રોત
- પુસ્તક : રાનેરી (પૃષ્ઠ ક્રમાંક 81)
- સર્જક : મણિલાલ દેસાઈ
- પ્રકાશક : ગૂર્જર ગ્રંથરત્ન કાર્યાલય
- વર્ષ : 1987
- આવૃત્તિ : 2