રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
લાલજી કાનપરિયા
એક સવારે બારીમાંથી છલાંગ મારી ઘર માલીપા કૂદી આવ્યું ખેતર!
આળસ મરડી નીંદરમાંથી જાગીને જોયું તો રોમેરોમ હતી હરિયાળી ફરફર!
ફળી, ઓસરી ઘર માલીપા સઘળે દૂધમલિયાં ડૂંડાંઓ ડોલે - કેમ લણું?
આલ્લે, ઊમટ્યાં પતંગિયાં ને ઊમટ્યા રંગો કેટકેટલા - કેમ કરીને ગણું?
ચાસચાસમાં અંકુર થઈને આમ અચાનક ઊગી ગયું તે કોણ રે બાલમ!
માલીપાની ભરબજ્જારે સાવ અચાનક લૂંટી ગયું તે કોણ રે બાલમ!
ડગલેપગલે ફાળ ભરંતાં હરણાંઓને ફાળ ભરંતાં શમણાંઓની ભીતર,
એક સવારે બારીમાંથી છલાંગ મારી ઘર માલીપા કૂદી આવ્યું ખેતર!
બગલા સૂંધે માટી ને આ ચકલી સૂંઘે દાણા : જોવાની કૈં મજા પડે છે!
સીમ પાથરી બેઠી એનાં લીલાં આણાં: જોવાની કૈં મજા પડે છે!
આકાશેથી દડી પડેલાં કુંજડિયુંનાં ગીતો ઝીલી તરણાં ખુશખુશાલ
ઉગમણી શેરીમાં કોઈનાં વધામણાંની કોઈ પૂરે રંગોળી રંગગુલાલ!
હવે ઘેનનાં લીલા દરિયે તરું: ડૂબું કે ઊગરું, કશી નથી ફિકર!
એક સવારે બારીમાંથી છલાંગ મારી ઘર માલીપા કૂદી આવ્યું ખેતર!
સ્રોત
- પુસ્તક : ગુજરાતી કવિતા ચયન 1993 (પૃષ્ઠ ક્રમાંક 53)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાત સાહિત્ય પરિષદ, અમદાવાદ
- વર્ષ : 1995