રેખ્તા
હિન્દવી
સૂફીનામા
રાજસ્થાની
ઝાકળનાં પાંચસાત ટીપાં
jhakalnan panchsat tipan
હર્ષદ ચંદારાણા
હર્ષદ ચંદારાણા
આખીયે રાત તને કહેવાની વાત મેં બોલ્યે રાખિ તો થયાં
ઝાકળનાં પાંચસાત ટીપાં
હોઠે જો હોત એ પંખીનું ગીત થઈ છોડી હું દેત
એને ફળિયાની ડાળના માળામાં
પગની જો થાત એ રણઝણતી ઝાંઝરી મૂકી હું દેત
એ ને સત્તરમા ઓરડે તાળામાં
અરે આંખોથી, ખોબાથી, ફૂલોથી, પાનોથી કેમે સચવાય ના
ઝાકળનાં પાંચસાત ટીપાં
સોયની અણી થઈ પ્હેલું કિરણ જ્યાં સૂરજનું ખૂંપ્યું તો
ફૂટ્યા કાળાડિબાંગ પરપોટા
બીજું કિરણ જ્યાં ટીપાંને સ્પર્શ્યું ત્યાં ટીપાંમાં પડી ગયા
જળના ય કારમા તોટા
મારા બોલ્યાનો નાદ, તને કહેવાની વાત, ઘોર અંધારી રાત-
-થયા દિવસ જેવા જ ખાલીપા.
સ્રોત
- પુસ્તક : ઉત્તરાયણ (પૃષ્ઠ ક્રમાંક 158)
- સંપાદક : દીપક મહેતા
- પ્રકાશક : નેશનલ બુક ટ્રસ્ટ, ઇન્ડિયા
- વર્ષ : 2008