રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

ઝાડ અને ખિસકોલી અને ઝાડ

રમેશ પારેખ

ઝાડ અને ખિસકોલી અને ઝાડ

રમેશ પારેખ

Roman

પાણી જેવી પાતળી ખિસકોલી રે ખિસકોલી રમે

ઝરમર ઝરમર ઝબકે એની બોલી રે ખિસકોલી રમે

ડાળી વચ્ચે ઊભું અવાચક ઝાડવું રે ખિસકોલી રમે

ખુલ્લંખુલ્લા થતું એ ક્યાં સંતાડવું રે ખિસકોલી રમે

ખિસકોલીએ ખોબોક પાડ્યો પડછાયો ખિસકોલી રમે

એમાં તો આખ્ખા ઝાડનો તડકો ઢંકાયો ખિસકોલી રમે

પાંદડું પાંદડું લસરક લસરક પીંછું થયું ખિસકોલી રમે

ઝાડમાં રેશમવરણું ઝાડવું ઊગી ગયું ખિસકોલી રમે

ખિસકોલીના જળમાં ઝાડ કૂંડાળે ચડ્યું ખિસકોલી રમે

ખિસકોલીને ઝાડવા જેવું મોતી જડ્યું ખિસકોલી રમે

ખિસકોલી (ઝાડવાને ચડેલો) ડૂમો રે ખિસકોલી રમે

ડાળી ડાળી બંધ હોઠની લૂમો રે ખિસકોલી રમે

હિંચકા જેવું ઝાડ ને ખિસકોલી જેવી ઠેસ રે ખિસકોલી રમે

શબરી-આંગણ રામ પધાર્યા ખિસકોલીને વેશ રે ખિસકોલી રમે

(ર૧-૪-’૭૬-બુધ.)

સ્રોત

પુસ્તક : ખડિંગ (પૃષ્ઠ ક્રમાંક 47)
સર્જક : રમેશ પારેખ
પ્રકાશક : નવભારત સાહિત્ય મંદિર
વર્ષ : 2011
આવૃત્તિ : સંવર્ધિત આ.