સ્નેહીનાં સોણલાં

સ્નેહીનાં સોણલાં

સ્નેહીનાં સોણલાં આવે સાહેલડી!

ઉરના એકાન્ત મારા ભડકે બળેઃ

હૈયાનાં હેત તો સતાવે, સાહેલડી!

આશાની વેલ મારી ઊગી ઢળે. (ધ્રુવ.)

ચડ્યું પૂર મધરાતનું, ગાજે ભર સૂનકારઃ

ચમકે ચપળા આભમાં,

એવા એવા છે પ્રિયના ચમકાર: રે સાહેલડી!o

ઉરના એકાન્ત મારા ભડકે બળે.

ઝરમર ઝરમર મેહુલો વરસે આછે નીર:

ઊને આંસુ નયનો ભીંજે,

એવાં એવાં ભીંજે મારાં ચીર: રે સાહેલડી!o

ઉરના એકાન્ત મારા ભડકે બળે.

અવની ભરી, વન વન ભરી, ઘૂમે ગાઢ અંધાર,

ઝબકે મહીં ધૂણી જોગીની,

એવા એવા છે પ્રિયના ઝબકાર: રે સાહેલડી!o

ઉરના એકાન્ત મારા ભડકે બળે.

ઝીણી જ્યોતે ઝળહળે પ્રિયનો દીપક લગીર:

પડે પતંગ, મહીં જલે,

એવી એવી આત્માની અધીર: રે સાહેલડી!o

ઉરના એકાન્ત મારા ભડકે ખળે.

ખૂંચે ફૂલની પાંદડી, ખૂંચે ચંદ્રની ધારઃ

સ્નેહીનાં સંભારણાં

એવાં એવાં ખૂંચે દિલ મોઝાર: રે સાહેલડી!o

ઉરના એકાન્ત મારા ભડકે બળે.

snehinan sonlan