હૈયાફૂટી

હૈયાફૂટી

હું તો સાગર ઉલેચવા ગઈ'તી સાહેલડી,

સાગર ગાગરમાં માયા નહિ;

સાગર ગાગરથી મોટા સાહેલડી,

હૈયાફૂટીએ મેં જાણ્યું નહિ.

હું તો આકાશે ઊડવા ગઈ'તી સાહેલડી,

પંખીની પાંખ મને ફૂટી નહિ;

માનવીને પાંખો ના ફૂટે સાહેલડી,

હૈયાફૂટીએ મેં જાણ્યું નહિ.

હું તો મોતીની દીપલીએ ગઈ'તી સાહેલડી,

મોતીની ચાર મને ભાવી નહિ;

મોતી ચરે રાજહંસો સાહેલડી,

હૈયાફૂટીએ મેં જાણ્યું નહિ.

હું તો ઝાકળને ઝીલવા ગઈ'તી સાહેલડી,

ઝીલ્યાં ઘણાં, એક આખું નહિ;

ઝાકળ ઝાંઝવાંનાં જેવાં સાહેલડી,

હૈયાફૂટીએ મે જાણ્યું નહિ.

હું તો મેઘધનુ ઝાલવા ગઈ'તી સાહેલડી,

એની કમાન હાથ આવી નહિ;

મેઘધનુ તેજની માયા સાહેલડી,

હૈયાફૂટીએ મેં જાણ્યું નહિ.

હું તો તીર્થોમાં તીરથ ગઈ'તી સાહેલડી,

તીર્થોમાં દેવ કોઈ જોયા નહિ;

ઈશ્વર વસ્યા છે મારા ઉરમાં સાહેલડી,

હૈયાફૂટીએ મેં જાણ્યું નહિ.

Haiyafuti