આવતા રે'જો!

આવતા રે'જો!

કો'ક દિ' તમે

હળવે ડગે આવતા રે'જો—આવતા રે'જો!

ભર બપોરે

છાંયડો બનીને આવતા રે'જો—આવતા રે'જો

ઢળતી સાંજે તારલા વીણી,

શગતી રાખું આશ ઝીણી,

સમ તમારા

વાયરાનો હળું હાથ ધરીને

તમ તમારે આવતા રે'જો!

રાત વીંચી જાય ના મારી,

થાય રાતી આંખ મારી,

સમ તમારા

શમણાંની સોગાત લઈને

તમ તમારે આવતા રે'જો!

એકલું એવું હૈયું કોરે,

વ્હાલ વિનાનું વેગળું સોરે,

સમ તમારા

હેતનો મીઠો સાદ બનીને

તમ તમારે આવતા રે'જો!

ઘરની ભીંતે,

ઘટના ઘાટે,

મેઘધનુના રંગ ઢોળીને,

સમ અમારા

કૂમળો રૂડો તડકો બની

તમ તમારે આવતા રે'જો!

aavtaa re'jo