રેખ્તા
હિન્દવી
સૂફીનામા
રાજસ્થાની
મછવારાનું ગીત
machhavaaraanun giit
દિનેશ ડોંગરે 'નાદાન'
દિનેશ ડોંગરે 'નાદાન'
દરિયામાં માછલીઓ જુએ છે સૌ, મેં તો માછલીમાં દીઠો છે દરિયો.
હોડકું ને જાળ તણા રૂડા સંગાથે હું મનખાના સાગરમાં ફરિયો.
વરતારા ચેતવતા વારેવારે તોય નીકળ્યો છું દરિયાને ખૂંદવા,
માછલીની ગંધને હું સૂંઘું શું કામ? મને માછલીઓ આવે છે સૂંઘવા.
શ્વાસોમાં એને મેં કાયમ છે સંઘર્યો ને રૂંવેરૂંવાંમાં એને ભરિયો.
હોડકું ને જાળ તણા રૂડા સંગાથે, હું મનખાના સાગરમાં ફરિયો.
માછલીઓ ઉપર મેં દીકરી પરણાવી ને દીકરાઓ ઠેકાણે પાડ્યા,
માછલીએ ઉકેલ્યા સઘળા પ્રસંગ, છેક તેરમાના લાડવાય વાળ્યા.
માછલીની પીઠ ઉપર થઈને સવાર મારો આખ્ખોયે ભવસાગર તરિયો.
હોડકું ને જાળ તણા રૂડા સંગાથે હું મનખાના સાગરમાં તરિયો.
સ્રોત
- પુસ્તક : નવનીત સમર્પણ : મે ૨૦૨૫ (પૃષ્ઠ ક્રમાંક 14)
- સંપાદક : દીપક દોશી
- પ્રકાશક : ભારતીય વિદ્યા ભવન