રેખ્તા
હિન્દવી
સૂફીનામા
રાજસ્થાની
વારતા
warta
પ્રાણજીવન મહેતા
પ્રાણજીવન મહેતા
હવે અંધારું ઊતર્યું, વારતાનો દીવો એક પ્રગટાવો; દાદાજી,
આંધળા રાજા ને રાણીના બાડા કુંવરને પટમાં લાવો; દાદાજી,
ભૂતિયા મહેલમાં કુંવરની આસપાસ, અજવાળું બાંધતું જાળાં; દાદાજી.
કુંવરીને જોઈ એ પોતાને પૂછતો, પડછાયા કેમ કાળા? દાદાજી,
પ્રશ્નો પહેરીને કેમ આગળ જવાશે, કુંવરને સમજાવો; દાદાજી.
ભાંગેલું વહાણ તેમાં ભરાતી રેતી, કેટલે દૂર છે જાવાનું? દાદાજી,
ટચૂકડો દરિયો ને હલેસાં તૂટફૂટ, કુંવરનું હવે શું થાવાનું? દાદાજી.
પ્રશ્નોને આરપાર વીંધે એવું, તીરકામઠું કુંવરને અપાવો; દાદાજી.
ગાઢ એક જંગલ ને જંગલમાં ભરેલી અંધારું ઘોર એક વાવ; દાદાજી,
પાણીમાં જુએ તો પોતે ને પડછાયો રમતા પકડદાવ; દાદાજી,
કુંવરને માણસ પરખાય જરી એટલું અજવાળું પથરાવો; દાદાજી.
આંધળા રાજા ને રાણીના બાડા કુંવરને પટમાં લાવો; દાદાજી,
હવે અંધારું ઊતર્યું, વારતાનો દીવો એક પ્રગટાવો, દાદાજી.
સ્રોત
- પુસ્તક : વીસમી સદીની ગુજરાતી કાવ્યમુદ્રા (પૃષ્ઠ ક્રમાંક 365)
- સંપાદક : ચન્દ્રકાન્ત શેઠ, યોગેશ જોષી, હર્ષ બ્રહ્મભટ્ટ, ઊર્મિલા ઠાકર
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2007