ઝીણા ઝીણા મેહ

ઝીણા ઝીણા મેહ

ઝીણા ઝરમર વરસે મેહ,

ભીંજે મ્હારી ચૂંદડલી:

એવો નીતરે કૌમારનો નેહ,

ભીંજે મ્હારી ચૂંદડલી.

આજે ઝરે ને ઝમે ચંદ્રીની ચંદ્રિકા,

ભીંજે રસિક કોઇ બાલા રે;

ભીંજે સખી, ભીંજે શરદ અલબેલડી,

ભીંજે મ્હારા હૈયાની માળા:

હો! ભીંજે મ્હારી ચૂંદડલી.

વનમાં પપૈયો પેલો પિયુ પિયુ બોલે,

ટહુકે મયૂર કેરી વેણાં રે;

ટમટમ ટમટમ વાદળી ટમકે,

ટમકે મ્હારા નાથનાં નેણાં:

હો! ભીંજે મ્હારી ચૂંદડલી.

આનન્દકન્દ ડોલે સુંદરીનાં વૃન્દ ને

મીઠા મૃદંગ પડછન્દા રે:

મંદ મંદ હેરે મીટડી મયંકની

હેરો મ્હારા મધુરસચંદા!

હો! ભીંજે મ્હારી ચૂંદડલી.

jhina jhina meh