ચહેરાનો ચપટી ગુલાલ

ચહેરાનો ચપટી ગુલાલ

તારા ચહેરાનો ચપટી ગુલાલ –

અને લાલ લાલ તડકો આ વહેલી સવારનો!

મોભારે હારબંધ ઘૂઘવે કપોત

બંધ ઓરડામાં રેશમની રાત,

હળુ હળુ વહેતા આ વાયરામાં તરવરતી

ક્યાંક ફૂલ ખીલ્યાંની વાત.

તારા લોચનનો શરમાતો છાક –

અને આંગણામાં ચીતરાતો જાસુદનો છાંયડો!

રેતીમાં ધસમસતા વહેણનો વળાંક

હજી કાંઠાની રાખે મરજાદ,

પાંદડીએ પાંદડીએ પડઘાતો ઘાસ અને

ઝાકળનો ઝીણો સંવાદ,

તારા સ્મિતભર્યા હોઠનો ઉઘાડ –

અને પોપચાંમાં અણસારો ઊઘડતા આભનો!

Chahera no chapati gulal