સોપો

સોપો

શું ચીતરવું કૅનવાસ પર, અકળ મથામણ કોરે

ઊડઝૂડ અંધારાં કોતર મનસા-પીંછી દોરે.

ગુફા ગહન જે શરૂ થતી પણ છેડો ના વરતાતો,

ગર્યા પછી પાછા વળવાનો રસ્તો ઑઝલ થાતો;

વચ્ચે પગમાં અફળાતો અજગર કાયા સંકોરે.

ધરા આવડી મેલી પેઠો કળણ-કૂવામાં શાને?

અવડ ભેજનો કાચીંડો ચપ ગળી જતો તડકાને

અવાવરું અંધાપો પસરે અહીંયા ખરા બપોરે.

અચલ ઘુવડની આંખો જાણે કોને ત્રાટક કરતી,

રડીખડી ઘટના સંચળનું બેડું લઈ સંચરતી,

સોડ તાણતો સૂરે સોતો સળંગ આઠે પ્હોરે.

sopo