રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
મઢુલી મઝાની પેલે તીર, સંતો વ્હાલા!
અનેરી અમારી એ લગીર! – મઢૂલીo
વૃક્ષો વેલડીઓવાળાં, કુમળાં ફળફૂલ રસાળાં;
લઈ જાવ લ્હાણાં એ લગીર, સંતો વ્હાલા!
મનની કંઈ મોજમજાઓ, રસિયાં ઉરનો કંઈ લ્હાવો:
લેવાને આવજો લગીર, સંતો વ્હાલા!
સામે સંસારી વિલસે, વચ્ચે જીવનસરિતા વહે,
રેલવિયે ત્યાં રસરંગ લગીર, સંતો વ્હાલા!
ઊડવાય સફર સહિયારી, સુખદુઃખની કંથા ધારી;
આનંદ ઑર એ લગીર, સંતો વ્હાલા!
લગની સ્હેવા સ્હાવાની, ગીતડાં પ્રભુનાં ગાવાની,
લાગે તો આવજો લગીર, સંતો વ્હાલા!
મઢુલી મઝાની પેલે તીર, સંતો વ્હાલા!
અનેરી અમારી એ લગીર!
સ્રોત
- પુસ્તક : વીસમી સદીની ગુજરાતી કાવ્યમુદ્રા (પૃષ્ઠ ક્રમાંક 583)
- સંપાદક : ચન્દ્રકાન્ત શેઠ, યોગેશ જોષી, હર્ષ બ્રહ્મભટ્ટ, ઊર્મિલા ઠાકર
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2007