રેખ્તા
હિન્દવી
સૂફીનામા
રાજસ્થાની
આશ
aash
નંદકુમાર પાઠક
નંદકુમાર પાઠક
પથ રે લાંબો ને ટૂંકું આયખું હો જી
ગગને ગોરંભાયો મેહુલો,
વરસી વાદળી જાય જી;
શામાં રે ઝીલું હું પાણી બાવરો,
ખોબે છલકાતું જાય જી;
પથ રે લાંબો ને ટૂંકું આયખું હો જી.
ખીલતી વસંતની વાડીએ,
આવ્યો ફુલડાંનો ફાલ જી;
કેમ રે ચૂંટું હું ફૂલ આવડાં?
છલકે ધરતીની છાબ જી;
પથ રે લાંબો ને ટૂંકું આયખું હો જી.
ઘૂઘવે સાગર કાળી રાત આ,
દૂર ઊઘડે ઉજાશ જી;
શઢ રે તૂટ્યા ને ડૂબે નાવડી,
તૂટે તોયે ના આશ જી;
પથ રે લાંબો ને ટૂંકું આયખું હો જી.
સ્રોત
- પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 83)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 2004